الخصوصية في Deutsch Reise

بناخد إيه؟

• الحساب: الاسم والإيميل (ولو الدخول بـ Google: الاسم والإيميل والصورة بس).
• عنك: النوع والسن التقريبي، والهدف والوقت المتاح وإجابات «إنت مين»، علشان الكلام يبقى بصيغتك والخطة تبقى على هواك.
• التعلّم: إجابات امتحان المستوى والتمارين، والتقدّم، والكلمات والغلطات اللي محتاجة مراجعة.
• الكتابة والكلام: النص المكتوب بيتحفظ مع النتيجة. التسجيلات الصوتية مش بنحفظها: بنحفظ بس ملخص مكتوب للكلام في نتيجة امتحان المستوى.
• الـ CV وجواب التقديم: بيتحفظوا في الحساب. العنوان ورقم الموبايل وتاريخ الميلاد بيفضلوا على الجهاز بس ومش بيتبعتولنا، وبيتمسحوا من الجهاز مع الخروج من الحساب، أو «البداية من الأول»، أو مسح الحساب.
• الكلام في مكالمة التدريب: المتصفح هو اللي بيحوّل الكلام لنص، وفيه متصفحات بتبعت الصوت لسيرفرات الشركة اللي عاملاها علشان تعمل كده. الصوت مش بيوصلنا خالص. بيوصلنا النص اللي بيتبعت في المكالمة بس، علشان العميل يرد وتتقيّم المكالمة، وبعدها مش بنحفظه: بنحفظ الدرجة بس.
• الاشتراك: الباقة والمبلغ ورقم عملية التحويل، واسم أو رقم اللي حوّل، علشان نتأكد إن الفلوس وصلت.
• الاستخدام: حاجات زي «خلّص مهمة» أو «فتح صفحة» من غير تفاصيل شخصية، وأخطاء تقنية لو حصلت، علشان نحسّن الموقع. قبل عمل الحساب بنعدّ الزيارات بس، من غير أي حاجة تعرّف الشخص.
• المكان والوقت: قبل الجلسة بنسأل عن مكان المذاكرة (البيت، المواصلات، الشغل، البريك)، وفيه سماعات ولا لأ، والوقت المتاح (3 أو 5 أو 15 دقيقة). آخر اختيار بيتحفظ مع الحساب، وبيتسجّل كمان في سجل الاستخدام، علشان التمارين تبقى على قد المكان والوقت.
• أول الناس: لو الهدية اتاخدت، بنحفظ رقمك بين أول الناس، ونوع الهدية (شهر أو أسبوع)، وتاريخها. ولو الحساب اتمسح، الرقم بيفضل محجوز، ومعاه كود محسوب من الإيميل (مش الإيميل نفسه)، علشان نفس الإيميل ميخدش الهدية مرتين.
• طريقة حل التمارين: كل سؤال أخد قد إيه، وصح ولا غلط، والصوت اتسمع كام مرة، والتلميح أو معاني الكلمات اتفتحت ولا لأ، ولو المهمة اتقفلت قبل ما تخلص: عند أنهي سؤال. وكمان الاختيارات السريعة لو اتداس عليها: «🤔 مش فاهم»، والمود، وأنهي تمرين كان أصعب، وسؤال الأسبوع. ده بيتسجّل مع الحساب زي باقي سجل الاستخدام، من غير أي كلام مكتوب، علشان نحسّن التمارين.
• التذكير: التذكير بالإيميل أو بإشعار على الجهاز مقفول في الأول، ومبيتفتحش غير من «حسابي». لو اتفتح، بنحفظ الميعاد اللي اتختار، ووقت الموافقة، وعنوان الإشعارات بتاع الجهاز (اللي المتصفح بيدّيه)، وآخر مرة التذكير اتبعت. الإيميل بيتبعت عن طريق خدمة Brevo (الإيميل والاسم الأول بس). التذكير مبيوصلش في يوم فيه مذاكرة، وبيقف لوحده بعد 7 تذكيرات ورا بعض من غير مذاكرة. ده تذكير بس، من غير إعلانات. وبيتقفل في أي وقت من «حسابي»، ولينك «إلغاء التذكير» اللي في الإيميل بيقفل الإيميل والإشعار مع بعض.
• الرأي: لو اتبعت رأي أو ملاحظة من جوه الموقع.

بنستخدمها في إيه؟

علشان نحدد المستوى ونعمل خطة يومية على هواك، ونفتكر الكلمات والغلطات اللي محتاجة مراجعة، ونأكد الاشتراك، ونصلّح المشاكل. مش بنبيع البيانات ومش بنستخدمها في إعلانات.

الكتابة والكلام بيتقيّموا إزاي؟

الكتابة والكلام بيتقيّموا أوتوماتيك علشان نقول المستوى والغلطات، من غير الاسم أو الإيميل.

مش بنستخدم كلامك ولا صوتك في تدريب أي نماذج.

متخزنة فين؟

البيانات محفوظة بأمان، وكل مستخدم يشوف بياناته هو بس. بنستعين بخدمات خارجية موثوقة في تقييم الإجابات وتخزين البيانات وإرسال الإيميلات، وممكن البيانات تتخزن على سيرفرات برّه مصر.

بنحتفظ بيها قد إيه؟

• بيانات الحساب والتعلّم: طول ما الحساب موجود.
• سجل الاستخدام والآراء: 6 شهور، وبعدها بتتمسح.
• الدفع: لو الحساب اتمسح بنحتفظ بالمبلغ والتاريخ والباقة بس من غير أي بيانات شخصية، علشان الحسابات.

البداية من الأول أو مسح الحساب

البداية من الأول: من «حسابي» ← «⚙️ إعدادات الحساب» ← زرار «🔄 مسح التقدّم والبداية من الأول». الحساب بيفضل، والتقدّم بيتمسح، وسجل الاستخدام بيتفصل عن الحساب، وكمان اللي الموقع شايله على الجهاز ده بيتمسح.

مسح الحساب كله: من «حسابي» ← «⚙️ إعدادات الحساب» ← زرار «🗑️ مسح الحساب»، أو رسالة من نفس إيميل الحساب لـ info@deutsch-reise.com، وهنمسح كل البيانات، ما عدا سجل الدفع المجهّل اللي فوق ورقم «أول الناس» (من غير اسم ولا إيميل). ولو المسح من الزرار، بيتمسح كمان اللي الموقع شايله على الجهاز ده.

تواصل

أي سؤال عن الخصوصية: info@deutsch-reise.com